गोवा पर्यटन विभागाला मुरगाव बंदर प्राधिकरणाकडून ‘उत्कृष्टता पुरस्कार’ प्रदान
आर्थिक वर्ष २०२५-२६ मध्ये क्रूझ जहाजांच्या उत्कृष्ट हाताळणीबद्दल गौरव
पणजी:
आर्थिक वर्ष २०२५-२६ मध्ये क्रूझ जहाजांच्या हाताळणीसाठी दिलेल्या महत्त्वपूर्ण योगदानाची आणि सहकार्याची दखल घेत, मुरगाव बंदर प्राधिकरणाने (Mormugao Port Authority – MPA) गोवा पर्यटन विभागाला अत्यंत प्रतिष्ठेच्या ‘उत्कृष्टता पुरस्कारा’ने (Award of Excellence) सन्मानित केले आहे.
गोवा पर्यटन विभागासाठी हा एक अत्यंत अभिमानाचा आणि गौरवाचा क्षण आहे. गोवा पर्यटन विकास महामंडळाचे (GTDC) व्यवस्थापकीय संचालक श्री. कुलदीप आरोलकर आणि पर्यटन विभागाचे सहायक संचालक श्री. जयेश काणकोणकर यांनी राज्याच्या वतीने हा पुरस्कार स्वीकारला.
हा पुरस्कार गोव्याची क्रूझ पर्यटन परिसंस्था (Ecosystem) अधिक सक्षम आणि बळकट करण्याच्या दिशेने सर्व घटकांनी केलेल्या सामूहिक प्रयत्नांचे फलित आहे. क्रूझ पर्यटनाच्या माध्यमातून गोव्यात येणाऱ्या हजारो पर्यटकांना उत्तम आणि सुरक्षित सुविधा पुरवण्यासाठी पर्यटन विभाग नेहमीच कटिबद्ध राहिला आहे, आणि या पुरस्कारामुळे या प्रयत्नांवर मान्यतेची मोहोर उमटली आहे.
या सन्मानामुळे जागतिक क्रूझ पर्यटन नकाशावर गोव्याचे स्थान अधिक भक्कम झाले असून, भविष्यातही क्रूझ पर्यटनाला चालना देण्यासाठी राज्य सरकार आणि पर्यटन विभाग सकारात्मक पावले उचलत राहील.
