मत्स्य व्यवसायातून रोजगाराच्या नव्या संधी; गोवा सरकारने सुरू केली विशेष योजना
राष्ट्रीय मत्स्य शेतकरी दिन 2026 (National Fish Farmers Day 2026) निमित्त गोव्यात आज एक कार्यक्रम आयोजित करण्यात आला होता. यावेळी मत्स्य व्यवसायाशी संबंधित शेतकरी, मच्छीमार आणि विविध घटकांच्या योगदानाचा गौरव करण्यात आला. या कार्यक्रमात मत्स्यव्यवसाय मंत्री निलकंठ हळर्णकर, वरिष्ठ अधिकारी आणि मत्स्य क्षेत्रातील अनेक प्रतिनिधी उपस्थित होते. या प्रसंगी गोव्याच्या ब्ल्यू इकॉनॉमीला (Blue Economy) बळकटी देण्यासाठी आणि अन्नसुरक्षा मजबूत करण्यासाठी मत्स्य क्षेत्राच्या योगदानाचे महत्त्व अधोरेखित करण्यात आले.
मड क्रॅब कल्चर युनिटसाठी आर्थिक सहाय्य योजनेचा शुभारंभ
कार्यक्रमात गोव्यात ‘मड क्रॅब कल्चर युनिट्स उभारणीसाठी आर्थिक सहाय्य योजना’ सुरू करण्यात आली. या योजनेद्वारे वैज्ञानिक पद्धतीने खेकडा पालनाला चालना देण्याचा सरकारचा प्रयत्न आहे. याशिवाय मत्स्य विक्रेत्यांसाठी असलेल्या आर्थिक सहाय्य योजनेत सुधारणा करून ती अधिक प्रभावी करण्यात आली आहे. यामुळे मूल्यवर्धन, उत्पादनवाढ आणि शाश्वत उपजीविकेला प्रोत्साहन मिळणार आहे.
500 हून अधिक लाभार्थ्यांना मंजुरीपत्रांचे वाटप
कार्यक्रमादरम्यान प्रधानमंत्री मत्स्य संपदा योजना (PMMSY) आणि राज्य शासनाच्या विविध योजनांअंतर्गत 500 हून अधिक लाभार्थ्यांना मंजुरीपत्रे आणि विविध लाभांचे वितरण करण्यात आले. या उपक्रमामुळे मत्स्य व्यवसायाशी संबंधित अनेक कुटुंबांना आर्थिक बळ मिळणार असून त्यांचे उत्पन्न वाढण्यास मदत होणार आहे.
📍Panaji Gymkhana, Panaji
Pleased to attend and address the 𝐍𝐚𝐭𝐢𝐨𝐧𝐚𝐥 𝐅𝐢𝐬𝐡 𝐅𝐚𝐫𝐦𝐞𝐫𝐬 𝐃𝐚𝐲 𝟐𝟎𝟐𝟔 Programme in the presence of Minister for Fisheries, Animal Husbandry Shri @NilkantHalarnk1, Senior Officials, celebrating the invaluable contribution of our fish… pic.twitter.com/NgC0ZunfQ2— Dr. Pramod Sawant (@DrPramodPSawant) July 9, 2026
पारंपरिक मच्छीमारांना सक्षम करण्यावर भर
राज्य सरकार पारंपरिक मच्छीमारांना सक्षम करण्यासाठी कटिबद्ध असल्याचे यावेळी पुन्हा स्पष्ट करण्यात आले. फिश सेलर कार्ड, आधुनिक पायाभूत सुविधा, बाजारपेठेपर्यंत सुलभ पोहोच आणि मत्स्य व्यवसायातील नव्या संधी उपलब्ध करून देण्यासाठी सरकार प्रयत्नशील असल्याचे सांगण्यात आले.
मत्स्य व्यवसायातील नव्या संधींवर भर
सरकारकडून खेकडा पालन (Crab Farming), शोभेच्या माशांचे पालन (Ornamental Fisheries), शेलफिश कल्चर आणि मत्स्यपालन (Aquaculture) यांसारख्या क्षेत्रांमध्ये नव्या संधी निर्माण करण्यावर भर दिला जात आहे. या क्षेत्रांमुळे रोजगारनिर्मिती आणि ग्रामीण अर्थव्यवस्थेला चालना मिळेल, असा विश्वास व्यक्त करण्यात आला.
युवकांना मत्स्य व्यवसायाकडे वळण्याचे आवाहन
यावेळी युवकांना मत्स्य व्यवसाय हा आधुनिक, तंत्रज्ञानाधारित आणि उद्योजकतेच्या संधींनी परिपूर्ण क्षेत्र म्हणून स्वीकारण्याचे आवाहन करण्यात आले. मत्स्य व्यवसायात नवतंत्रज्ञानाचा वापर करून मोठ्या प्रमाणात रोजगार आणि स्वयंरोजगाराच्या संधी उपलब्ध होऊ शकतात, असे सांगण्यात आले.
